সুজনের কাছে সুজনেষু
জুবায়ের সিদ্দিকী, সিটি নিউজঃ চাটগাঁ শহরত অনেক সুনাম অর্জন গইজ্জ্যন। অল্প কয়েকদিনর দায়িত্ব পাইলেও অ’নর আন্তরিকতা, সাহসীকতা, শ্রম, মেধা, মনন’রে আঁরা শ্রদ্ধার সাথে স্মরণ গইজ্জ্যম।
ফকিরহাট’র আওয়ামী লীগ নেতা ইলিয়াছ ভাই কদ্দে, চাটগাঁ শহরত উন্নয়নের রূপকার সুজনভাই। তাইনে কদ্দে, কষ্টসহিষ্ণু, ত্যাগী ও রাজনীতিবিদ সুজন ভাই চাটগাঁর বন্ধু, গরীবর বন্ধু। বক্সিরহাটের লাইল্যা কদ্দে, সুজনভাই কাজ গরের। এইল্যা কাজ গইল্ল্যে নগরবাসী উপকৃত অইব। চামচা চাটুকার গোষ্ঠীরে তিনমাইল দুরে রাখি কাজ গরের। ছোটপোলর নুর মোহাম্মদ কদ্দে, যেডে অন্যায় অবিচার এডে সুজন ভাই। ইবা ভাল লাগের।
হামজারবাগের মুদি ব্যবসায়ী হান্নান ভাই কদ্দে, সিটি কর্পোরেশনের ভিতর জি¦ন ভুত আছিলু। এগুনারে সিধাসাদা গরি চলিবারল্যাই তাইনে হইয়্যে। শেখ মুজিব সড়ক দেওয়ানহাটত’তুন চৌমুহনী পর্যন্ত রাস্তার দুইপাশে গাড়ীর গ্যারেজ, মেরামতর কারখানা আছে। পুলিশ তারা’ত্তুন মালপানি লই যায়। যেডে হেডে বাজার, ফুটপাতে দোয়ান সারা শ’হরত। বাছুনির বাপ আস্তা বেয়াদপ হদ্দে, অ’নার দলের ল্যাদা পোঁয়ারা চাঁদা তুলি খায় আবার মাইজ্জ্যারে ভাগ দেয়। এই সরকারর আমলে অনার দলর মাইজ্জ্যা অ’ল ভালা আছে। ঘর’র ট্যায়া আইয়্যের। চিন্তা নাই।
আগ্রাবাদ সিডিএ’র বাসিন্দা জরিনা খাতুন খালেদা জিয়ারে মা ডাইক্ক্যে। আঁরে কদ্দে, এমপি-মন্ত্রীরে চৌমুহনী বাজারত আ্ইতে কউয়ুন। তরিতরকারি, মাছ, মাংস বেয়াগ্গিন’র দাম নাগালর বাইরে। বাজারত গেইলে মাথা ঘুরে। চাটগাঁর আইনশৃঙ্খলা ভাল’ন। সাংবাদিক গায়েব অইলেও পুলিশ ন’পায়। পুলিশ’র ট্রেকিং-ফ্রেকিং কি কাজ ন’গরের? হাটহাজারির টেম্পুচালক ৩দিনেও অপহরনের পর উদ্ধার গরিত ন’পারে। তারপর তার লাশ পাইয়ে। চোর, ডাহাইত, ছিনতাই, রাহাজানি, অপহরন, পকেটমার, প্রতারকচক্র চাটগাঁত ঘুরে বেড়ার।
শহ’রর সাগরিকাত্তুন যুবক গায়েব অইলেও পুলিশ চেরাগবাতি লই টোয়ায়। বাহ কি চমৎকার। অ’নে এগিন লই মাথা ঘামাইয়্যুন। ন’অইলে পাবলিক নাখোশ অইব্যু। ক্ষমতা ও রাজপথ কাছাকাছি। আল্লাহ অ’নরে হেফাজত করুন। মন’ত রাইবান আল্লাহ নির্যাতিত ও গরীবের ফরিয়াদ খুব তারাতারি কবুল গরে। মানুষের খেতমতের পুরস্কার আল্লাহ অ’নরে দিব ইনশাআল্লাহ।